Kata Sambutan Ketua Punguan Raja Toga Sitompul dohot Boruna Pekanbaru Sekitarna Periode 2013 - 2015

Hulman Sitompul

Parjolo ma hita mandok mauliate tu amanta perdenggan basa i disude asi dohot holong ni rohaNa namangiring daging dohot tondinta di pardalanan ni ngolunta siganupari boi hita horas jala marhahipason. Suang songon i do nang pardalanan ni punguan Raja Toga Sitompul dohot boruna Pekanbaru sekitarna na sai tongtong diramoti Tuhanta.

Dua taon na bagas ma hami manguluhon punguan on, sian taon 2013 sahat tu taon 2015 on. Mardalan do punguan on dohot denggan jala renta do sude angka ruas molo adong angka na masa di tonga-tonga ni anggota baik sitaonon manang silas ni roha pe.

Huakui hami do, godang do kekurangan nami dimanguluhon punguan on. Alai kekurangan i hubaen hami do i songon sada kekuatan dinaloho mandalanton punguan on. Songon sada contoh, hami ndang apala pasih marbahasa batak, maklum sudah lahir di kota Pekanbaru. Alai ala punguan on berlatarbelakang habatakon, sai tongtong hami marbahasa batak di setiap ulaon di tonga-tonga ni punguan. Nang pe marpasir-pasir bahasa batak nami, tong sai hujugulhon hami. Alani i gabe dapot do.

Sada dorongan do  on tu hita halak batak na tubu di kota, tarlumobi di marga sitompul angka na umposo. Unang maila hita sebagai halak batak jala unang maila hita marhata batak. Ido budayata jala ido tona ni ompunta sijolo-jolo tubu ingkon talestarihon do budaya batak i. Di punguan on, habatahon do latar belakangna. Sude ulaon na adong di punguan on memakai hata batak. Jala ndang boi diterjemahkan on tu bahasa Indonesia apalagi umpasa batak.

Punguan on milik kita bersama. Ise pe, boi do ketua di punguan on, asalma boi memimpin jala dilean rohana. Napogos pe na so adong mobilna boi do, namora pe boi do. Sahali nai hudok, ise pe boi do asalma “dilean rohana”. Jala sesuai do i tu anggaran dasar dohot anggaran rumah tangga ni punguanta (AD/ART). Tung na denggan do AD/ART – ta on jala molo boi torus ma tapertahankan tu ari nanaeang ro.

Marhite on hupasahat hami godang mauliate tu penasehat dohot natua-tua nasai tongtong mangajari hami jala nasai tongtong mangalehon semangat tu hami di nalaho manguluhon punguan on.

Dohot on hami mangido maaf tu sude ruas ni Sitompul dohot Boru na adong di Pekanbaru sian roha naias dohot roha na parbagasan. Molo tung adong kesalahan nami sude pengurus selama na dua taon on - selama kepemimpinan nami - asa maafhon hamu sian bagas roha muna. Molo tung adong sian pangalangka nami, pemereng nami, pambahenan nang pangkataion nami na hurang suman asa bolongkon hamu sian bagas roha muna songon parsalpu ni taon 2014 i. Ai i dope na tarbahen hami.

Sai Tuhanta ma namandongani jala nama-masu hita saluhutna di sude panggulmiton ni ngolunta. Horas…Horas…Horas. Selamat berpesta Bonataon 2015. Amin.

S. Hulman Sitompul, SE

Ketua Punguan Raja Toga Sitompul dohot Boruna

Pekanbaru Sekitarna

Perode 2013-2015